અમારા ચુંટેલા અમને નડે છે…કવિતા

  

અમારા ચુંટેલા અમને નડે છે…કવિતા

====================================

 

ચુંટણીમાં શીરા પુરીની પંગત જમાડી

 

પૈસા કપડાં વહેચી ને દારૂ પીવડાવી

 

મતો ઉઘરાવીને દિલ્હી દોડે છે…અમારા ચુંટેલા અમને નડે છે.

 

અહિંસાની વાતો કરી લોકોને ભરમાવી

 

એક બીજાને આક્ષેપોથી નવડાવી

 

રેલીમાં ને સભામાં પથરા પડે છે…અમારા ચુંટેલા અમને નડે છે.

 

ચુંટાયા પછી સુરત (મોઢું) ના દેખાડી

 

ભોળી પ્રજાને વચનોમાં ભરમાવી

 

પાંચ વર્ષે લોકોની પાછળ પડે છે…અમારા ચુંટેલા અમને નડે છે.

 

ધર્મો ને કોમોના પ્રશ્નો જગાવી

 

અનામત માટે લોકોને લડાવી

 

અખંડતા ને એકતાની રાડો પાડે છે…અમારા ચુંટેલા અમને નડે છે.

 

રેલીઓ અને યાત્રાઓમાં ભીડ જમાવી

 

ટ્રાફિકમાં નિર્દોષ જનતાને ફસાવી

 

હવે ખૂણે ખાંચરે  શોધ્યા ના જડે છે…અમારા ચુંટેલા અમને નડે છે.

 

ચુંટાયા પછી એ મહેલોમાં પહોંચી

 

કુટુંબ સાથે પરદેશના ચક્કરો કાપી

 

ફક્ત વેતન ને  ભથ્થાં માટે લડે છે…અમારા ચુંટેલા અમને નડે છે.

 

રાહુ અને કેતુ તો સૌને નડે છે 

 

આ જીવતા ભૂતો છાતી પર ચડે છે 

 

‘સ્વપ્ન’ નું વ્યથિત અંતર રડે છે…અમારા ચુંટેલા અમને નડે છે.

 

=======================================================

મિત્રો આ વિચાર અને કવિતા નવ નિર્માણ અને કટોકટીના સમય ની છે

 

સ્વપ્ન જેસરવાકર