પરાર્થે સમર્પણ
કોઈ ભૂખ્યાને રોટલો દીધો રે નથી…. ( ભજન )
=================================================================================================
કોઈ ભૂખ્યાને રોટલો દીધો રે નથી, પછી અન્નદાન કરવાથી શો ફાયદો ?
દીન દુઃખિયાના આંસુને રોક્યાં નથી, પછી સપનાં બતાવીને શો ફાયદો ?
હે…. માના દુધના કરજને તું ભૂલી ગયો,
તેની મોઘેરી મમતાને છેતરી ગયો,
જેની આશાઓ નો તું સહારો હતો , તેને બે ઘર કરવાથી શો ફાયદો ?
હે …. મોહ માયામાં માનવતા ભૂલી ગયો,
લોભ લાલચમાં પુણ્યને વિસરી ગયો,
આવ્યો અવસર માનવ કેરા રૂપનો, તેને જીવી ના જાણ્યો તો શો ફાયદો ?
હે…. તારી જિંદગીના દિવસો સુનહરા હતા,
ત્યારે કોઈને તેં યાદ કર્યાં રે નહોતા,
જયારે જીવનના દિવસો ભૂંડા આવ્યા, ત્યારે પછતાવો કરવાથી શો ફાયદો ?
હે…. હર ઘડી જે પ્રભુ ને રે યાદ કરે,
તેની જીવન નૈયા પ્રભુ પાર કરે,
કહે “માનવ” આજે આ સંસાર ને, મળ્યો મનખો બગાડી ને શો ફાયદો ?
========================================================
રચયિતા : ” માનવ “
સંકલન: સ્વપ્ન જેસરવાકર ( ગોવિંદ પટેલ )
